MAHAFALI YA JUMUIYA YA WANAFUNZI NA VIJANA WA KIISLAMU TANZANIA (TAMSYA) VYUO VIKUU VYA MKOA WA MBEYA, 2017.

ASSALAMU ALAYKUM WARAHMATULLAHI WABARAKATUH.

SHUKRANI ZA DHATI NI ZAKE YEYE ALLAH (SW) MOLA WA VIUMBE WOTE, NA REHMA NA AMANI ZIMFIKIE MTUME WETU MUHAMMAD (SAW).

TAREHE 14/05/2017 ILIKUWA NI SIKU ADHWIMU, SIKU TAMU, SIKU YA MASHAMSHAM AMBAYO WANAJUMUIYA YA WANAFUNZI WA KIISLAMU WA CHUO KIKUU TEOFILO KISANJI WALIUNGANA NA WANAFUNZI WENZAO WA KIISLAMU WA VYUO VIKUU VYA MKOA WA MBEYA (SAUT, MZUMBE, MUST, MMTC, MATI-IGURUSI, CDTI, TIA, TUMAINI UNIVERSITY, ST AGGREY, CHUO CHA UTUMISHI WA UMMA CHA TANZANIA, N.K.)  KATIKA MAHAFALI YA KUWAAGA KAKA NA DADA ZAO AMBAO WANATARIJIA KUMALIZA MASOMO YAO MUDA SIO MREFU UJAO. MAHAFALI ILIFANYIKA KATIKA CHUO KIKUU SAUT, MBEYA.

WANAJUMUIYA WA TAMSYA MBEYA WAKIWA KATIKA MAHAFALI YA WANAFUNZI WA VYUO VIKUU.

MAHAFALI ILIKUWA CHINI YA USIMAMIZI WA JUMUIYA YA WANAFUNZI NA VIJANA WA KIISLAMU TANZANIA (TAMSYA) MKOA WA MBEYA.

KULIKUWA NA HARAKATI MBALIMBALI ZA KIDINI IKIWEMO KUWAUSIA VIJANA WA KIISLAMU KUHUSU UJASIRIAMALI NA UMUHIMU WA KUJIAJIRI, UMUHIMU WA NDOA, UMUHIMU WA KUITUMIA ELIMU NA NYADHIFA MBALIMBALI KATIKA KUUPELEKA MBELE UISLAMU PAMOJA NA JINSI YA KUISHI KATIKA MAADILI YA KIISLAMU.

MH. MGENI RASMI, SHEIKH DUURU AKITOA MAWAIDHA YA KUWAUSIA VIJANA JINSI YA KUISHI MAISHA YA USILAMU PAMOJA NA KUITUMIA ELIMU YAO KWA MASLAHI YA DINI.

 

DR. SULE AKITOA MAWAIDHA NA KUFAFANUA UMUHIMU WA ELIMU KATIKA UISLAMU KWA MUJIBU WA QURANI NA SUNNAH.

PIA KULIKUWA NA USOMAJI WA RISALA  AMBAYO ILISOMWA MBELE YA MBENI RASMI NA BAADAE KUKABIDHIWA MGENI RASMI KAMA ILIVYO KAWAIDA. RISALA ILISOMWA NA ALIEKUWA AMIR WA MSATEKU AMBAE PIA ALIKUWA NI AMIR WA IDARA YA ELIMU, DAAAWA NA MAADILI TAMSYA, USTADH IMANI SALEH.

 

USTADH IMANI SALEH AKISOMA RISALA YA WANAJUMUIYA YA TAMSYA.

PIA KULIKUWA NA ZOEZI LA UGAWAJI WA VYETI KWA WANAFUNZI WANAOKARIBIA KUHITIMU MASOMO YAO, ZOEZI HILI LILIENDESHWA NA MGENI RASMI SHEIKH DUURU KUTOKA TAASISI YA DHIL-NNURAYN.

    

    

WANAFUNZI WAHITIMU NA WANAJUMUIYA YA TAMSYA NA MSATEKU WAKIKABIDHIWA VYETI VYAO VYA USHIRIKI NA MGENI RASMI SHEIKH DUUR KUTOKA TAASISI YA DHIL-NNUURAYN.

PIA KULIKUWA NA ZOEZI LA KUPIGA PICHA ZA PAMOJA ZA WANAJUMUIYA YA MSATEKU KWA AJILI YA UKUMBUSHO, PAMOJA NA KUWAAGA NA KUONESHA UPENDO KWA KAKA NA DADA ZAO WANAOTARAJIA KUONDOKA CHUONI BAADA YA KUMALIZA MASOMO YAO KATIKA SIKU CHACHE ZIJAZO.

 

             

PICHA ZA PAMOJA ZA WANAJUMUIYA YA MSATEKU ZILIZOPIGWA SIKU YA MAHAFALI YA TAMSYA MKOA WA MBEYA (2017). PICHA ZINAJUMUISHA WAHITIMU PAMOJA NA NDUGU ZAO WANAOENDELEA NA MASOMO.

UONGOZI WA JUMUIYA YA WANAFUNZI CHUO KIKUU TEOFILO KISANJI (MSATEKU, MBEYA) TUNAPENDA KUTOA SHUKURANI ZETU ZA DHATI KWA WATU WOTE WALIOSHIRIKI KATIKA MAHAFALI YA KUWAAGA KAKA NA DADA ZETU WANAOMALIZA MASOMO YAO, HATUNA CHA KUWALIPA ILA ALLAH (SW) ATAWALIPA KWA WEMA WAO WALIOUFANYA.

PIA TUNAWAPONGEZA KAKA NA DADA ZETU WANAOMALIZA MASOMO YAO, NA TUNAMUOMBA ALLAH (SW) AWAJAALIE KILA LA KHERI KATIKA MAISHA YAO BAADA YA MASOMO.

PIA TUNAMUOMBA ALLAH (SW) ATUJAALIE SIE SOTE AMBAO BADO TUNAENDELEA NA MASOMO TUENDELEE KWA SALAMA HADI KUFIKIA MWISHO TUMALIZE KWA SALAMA KWA UWEZO WAKE.

TUNAAMINI DINI YETU NDIYO ILIOTUUNGANISHA NA KUTUFANYA WAMOJA NA KUSHIRIKIANA KATIKA MAMBO YETU MBALIMBALI. MUNGU AJAALIE USHIRIKIANO NA UMOJA HUU UENDELEE KWA KIZAZI NA KIZAZI ILI KUUPA NGUVU UISLAMU.   AAAAMIIN.

WABILLAHI-TTAUFIQ

MAANDALIZI YA KUUPOKEA MWEZI MTUKUFU WA RAMADHANI

 

Asslaamu alaykum warahmatu llahi wabarakaatuh;

Shukurani zote anastahiki Allah, na rehema na amani ziwe juu ya Mtume Muhammad.

Siku zote inatakiwa muislam asiwe mwenye kuzembea katika mambo mbali mbali yenye manufaa, khususani misimu ya utiifu kama vile Ramadhani. Bali inatakiwa awe wa mwanzo katika twa’a hizo na awe ni mwenye kushindana na kuhakikisha ya kwamba hakuna anaye mpita.

قال الله تعالي:( وَفِي ذَلِكَ فَلْيَتَنَافَسِ الْمُتَنَافِسُونَ)

المطففين:26

 Anasema Allah ndani ya kitabu chake kitukufu:

(Na katika hayo {mambo ya kheri} washindanie wenye kushindana). 

Suurat Al Mutwafifiin: 26

Imepita miezi, mawiki na masiku na hivi sasa umekaribia Mwezi wa Qur‘an, mwezi wa Baraka, mwezi wa ibada za usiku, mwezi wa kukubaliwa dua za waumini. Ewe Allah tufikishe Ramadhani!

Maswahaba walilelewa  na madrasa ya Mtume wakihisi hisia hizi za kuwa na shauku ya kuufikia mwezi wa fadhila, wakiishi na dua hii "Ewe Allah tufikishe Ramadhaan!"

Wakawa wakimuomba Allah awafikishe Ramadhani kabla ya miezi sita, na miezi sita mingine wakimuomba Allah akubali ibada zao.

Bila shaka hisia hizi na hali hii haikujengeka kwa Maswahaba isipokuwa kwa kujua fadhila za mwezi huu, na nafasi ya mwezi wa Ramadhani. Je ili tuweze kuupatia haki  mwezi huu mtukufu wa Ramadhani tunatakiwa tufanyaje?

MAANDALIZI   YA MWEZI WA RAMADHANI:

Bila shaka shughuli yoyote ile huwezi kuifanya vizuri isipokuwa mpaka uwe na utaalam nayo na umeifanyia mazoezi. Tuchukulie mfano michezo, iwapo kama timu itakuwa na mechi basi hutenga muda maalumu kwa ajili ya mazoezi ili kujiweka fiti na mechi hiyo. Licha ya kwamba wana utaalamu na mpira lakini yawapasa wafanye mazoezi ili waweze zimudu pirika za uwanjani.

Vile vile ibaada mbali mbali ikiwemo funga ya mwezi mtukufu wa Ramadhani inahitaji ujuzi na maandalizi, ili tuweze  kuzikusanya fadhila mbali mbali zilizomo ndani ya mwezi mtukufu wa Ramadhani. Ikiwemo kufutiwa madhambi, kukubaliwa ibaada hiyo ya funga na mengineyo.

Maandalizi hayo ni:

1. Kumuomba Allah Atufikishe Ramadhani

Kukithirisha kumuomba Allah atufikishe  katika mwezi wa ramadhani "Ewe Allah tufikishe Ramadhani":

Masiku haya ambayo tumeukaribia mwezi mtukufu wa Ramadhani inatubidi tuzidishe sana kumuomba Allah atufikishe ramadhani.Kwani kufikishwa ramadhaani ni moja ya neema za Allah.Watu wengi watamani kufikkishwa mwezi mtukufu wa ramadhani lakini si kila mmoja  anaye tamani ataufikia.Kuna baadhi ya watu tulikuwa nao ramadhani iliyo pita lakini mpaka hivi sasa hatupo nao tena.Kwa hiyo sie tulio ruzukiwa uhai mpaka hivi sasa yatubidi tujitahidi kumuomba Allah atufikishe mwezi huu mtukufu wa ramadhani mwezi wa fadhila"Ewe Allah tufikishe ramadhani".

2. Kukithirisha kufunga katika mwezi wa shaabani:

Ni sunna kukithirisha swaumu katika mwezi wa shaabani kwa ajili ya kuiweka sawa nafsi kwa ajili ya kuupokea mwezi wa ramadhani.

Na hii ndio ilikuwa  hali ya mtume,kama anavyo simulia Ummu al mu-uminiina Aisha radhi za Allah ziwe juu yake   

(مَا رَأَيْتُ رَسُوْلَ الْلَّهِ صَلَّىَ الْلَّهُ عَلَيْهِ وَ سَلَّمَ اسْتَكْمَلَ صِيَامَ شَهْرٍ قَطُّ إِلَّا رَمَضَانَ وَ مَا رَأَيْتَهُ فِيْ شَهْرٍ أَكْثَرَ صِيَاما مِنْهُ فِيْ شَعْبَانَ) 

رَوَاهُ الْبُخَارِيُّ

(Sikumuona Mtume anakamilisha swaumu mwezi mzima isipokuwa Ramadhani. Na sikumuona anakithirisha funga katika miezi kama alivyo kuwa akikithirisha kufunga katika mwezi wa Sha'baani)

Hadithi imepokelewa na Bukhari.

Kwa hiyo yapendezwa kuanza kufunga tokea mwanzo mwa mwezi wa Sha’aban, vile vile siku tatu katika mwezi; yaani ayyaamul baidh (Siku za tarehe13,14 na15 za kalenda ya Hijri) Vile vile siku ya Jumatatu na Alkhamis.

NB: Haitakiwi kufunga siku moja au mbili kabla ya Ramadhani

 عَنْ أَبِىْ هُرَيْرَةَ رَضِىَ الْلَّهُ عَنْهُ قَالَ:قَالَ رَسُوْلُ الْلَّهِ صَلَّىَ الْلَّهُ عَلَيْهِ وَسَلَّمَ:(لَا تُقَدِّمُوا رَمَضَانَ بِصَوْمِ يَوْمٍ وَلَا يَوْمَيْنِ إِلَّا رَجُلٌ كَانَ يَصُوْمُ صَوْما فَلْيَصُمْهُ) 

رَوَاهُ مُسْلِمٌ

Imesimuliwa kutoka kwa Abu Huraira radhi za Allah ziwe juu yake kasema: Kasema Mtume Muhammad rehema na amani ziwe juu yake (Msitangulize Ramadhani kwa kufunga siku au siku mbili, isipokuwa kwa yule aliye kuwa akifunga kabla yake basi afunge) 

Hadithi imepokelewa na Muslim.

Yaani haitakiwi kufunga siku moja au mbili kabla ya Ramadhani isipokuwa kwa yule aliyekuwa akifunga kabla. Mfano kwa yule aliyekuwa akifunga siku ya Jumatatu na Alkhamisi. Basi   ikidondokea moja ya hizo siku kabla ya Ramadhani  kwa siku moja au mbili hakuna tatizo kwa mtu huyu kufunga. Au kwa yule mtu aliye panga kufunga mwezi wa shaabani karibia wote kama alivyo kuwa akifanya mtume basi hakuna tatizo. Au kwa mtu aliyekuwa kajizoesha kufunga siku na kufuturu siku basi hakuna tatizo kwake kufunga pia.

Vile vile haitakiwi kufunga siku ya shaka. Na siku ya shaka ni siku ya thelathini ya mwezi wa shaabani ikiwa usiku wake ulikuwa ni wenye mawingu mengi kiasi kwamba ikawa hawezekani kujua kama kuna mwezi au hapana.Imeitwa siku ya shaka kwa sababu katika hali hiyo ya mawingu tunakuwa na shaka je mwezi umeonekana au hauja onekana?

Wanazuoni wametofautiana kuhusiana na katazo la kufunga siku hii ya shaka. Je ni katazo linalo fidisha uharamu wa kufunga siku hii au ni katazo linalo fidisha karaha (yaani yachukiwa)kwa hiyo ni bora zaidi mtu asifunge?

Rai yenye nguvu juu ya suala hili ni kwamba katazo hili linafidisha uharamu kufunga siku hii kama inavyo onekana wazi katika hadithi za Mtume (rehma na amani juu yake)

3. Kuishi na Qur ani:

Yatakiwa kujitahidi katika kusoma Qur ani angalau juzu moja kwa siku, ili mpaka unaisha mwezi wa shaabani unakua ushakhitimisha Qur ani japo mara moja. Vile vile yatakiwa kutenga muda maalumu kwa ajili ya kusoma na kuzingatia aya mbali mbali katika Qur ani na wala si kutosheka kwa kuisoma haraka haraka tu.

4. Qiyamu llayli:

Yatakiwa kujitahidi kuswali  ibaada za usiku tahajudi na witri; japo raakaa mbili tahajudi na rakaa moja witri. Swali rakaa mbili kwa mazingatio. Kumbuka swala ni mawasiliano kati ya mja na Mola wake. Wakati wa kuswali hisi ya kwamba unazungumza na Allah na anakuona na kukusikia. Soma suurat al Faatiha na sura baada yake kwa mazingatio na utulivu wa hali ya juu, kwa kufanya hivyo utahisi radha ya ibada isiyo sifika na kuhisi furaha ya maisha ya kweli. Kwani furaha ya maisha ya kweli inapatikana katika kumtii Allah sub-hanahu wata’ala na kukithirisha ibaada mbali mbali ikiwemo kuswali na ibaada za usiku. Na yule atakaye hisi ya kwamba kumtii Allah na kutekeleza ibaada mbali mbali  ni kujibana na kuto yafaidi maisha basi dhana yake hiyo itakuwa ni potofu.

5. Kujifunza hukumu zinazo husiana na Ramadhani:

Inatakiwa muislamu amuambudu Allah ‘azza wa jall kwa elimu au ujuzi, kwani kujua hukumu za faradhi mbali mbali ambazo Allah ta’ala kazifaradhisha kwa wanaadamu ni lazima kwa kila muislamu. Na katika faradhi hizo ni faradhi ya funga ya mwezi mtukufu wa Ramadhani. Kwa hiyo yatakiwa kujua  hukumu na mas’ala mbali mbali yanayo husiana na funga ya mwezi mtukufu wa Ramadhani ili funga zetu ziwe sahihi na ziweze kubaliwa. Kwa hiyo yatupasa kusoma vitabu mbali mbali vinavyo husiana na funga ya Ramadhani na kuwauliza wenye elimu katika yale mambo tunayo tatizwa nayo.

Anasema mwenyezi Mungu mtukufu ndani ya Qur ani

فَاسْأَلوا أَهْلَ الذِّكْرِ إِنْ كُنْتُمْ لا تَعْلَمُونَ))

الأنبياء :7

(Basi waulizeni wenye elimu ikiwa nyinyi hamjui.)

Al anbiyaa:7

6.  Kuizoesha nafsi kwa kupunguza baadhi ya vyakula:

Inatakiwa ujizoeshe kuacha baadhi ya vyakula licha ya kwamba wavipenda ili nafsi yako itakapo fika Ramadhani iwe ishazoea hali ya kuacha baadhi ya mambo, hali itakayo pelekea kufunga Ramadhani kiurahisi. Yatakiwa ujitahidi kuipa dunia mgongo (Azzuhdi) kiasi kwamba mwezi wa shaabani kwako uwe una tofauti kiasi na miezi mingine katika vyakula, vinywaji mavazi na mengineyo. Mfano mzuri katika hili ni wale ambao huumwa na vichwa kwa sababu ya kukosa chai asubuhi, basi inafaa kuanza kujizowesha kukosa kunywa chai hata kabla ya mfungo wa Ramadhani ili ikifika Ramadhani jambo hili lisikupe taabu. 

7. Mazoezi ya ulimi:

Yatakiwa ujizoeshe kusema ukweli na kuachana na uongo, usengenyaji na ufitinishaji. Kwani mambo haya hayatakiwi yafanywe na muislamu yoyote na kwa mfungaji  basi makatazo yake ni ya hali ya juu. Haitakiwi mfungaji awe ni mwenye kudanganya kusengenya na kufitinisha watu.

قَالَ الرَسُوْلُ الله صَلَّى الله عَلَيْهِ وََسَلَّم: "مَنْ لَمْ يَدَعْ قَوْلَ الزُّوْرِ وَالعََمَلَ بِهِ فَلَيْسَ لِله حَاجَةٌ فِيْ أَنْ يَدَعَ طعَامَهُ وَشَرَابَهُ" (رواه البخاري والترمذي وأبو داود وابن ماجه وأحمد)

Imetokana na Abu Hurairah (Radhi za Allaah ziwe juu yake), Amesema Mtume rehma za Allaah na amani zimshukie): “Yoyote ambaye hatoacha kauli za uwongo (chafu) pamoja na matendo, basi Allaah hana yaja ya mtu huyu kuacha kula na kunywa. (Imepokelewa na Bukhari, MuslimAbu Dawud, Ibn Majah na Ahmad)

Hadithi hii itatuthibitishia kwamba ulimi mchafu ni tosha kuwa sababu ya kutokubali kwa funga ya mfungaji.

8. Kuihesabu nafsi:  

Ni bora kila mwisho wa siku ukakaa na kuihesabu nafsi yako umefanya madhambi mangapi na kumtubia Allah na kuahidi ya kwamba huto rudia tena, na kukumbuka adhabu ya moto, je mwili wako upo tayari kuishi motoni? Bila shaka hii pia itakusaidia  katika kutekeleza funga ya mwezi mtukufu wa Ramadhani kwa ukamilifu. Kwani funga ya Ramadhani si kujizuia na vyakula vinywaji na yale yenye kufuturusha, bali ni funga ya mauvo pia. Lengo la funga ya mwezi mtukufu wa Ramadhani ni kuwafanya watu wawe wachamungu. Na uchamungu ni kufuata maamrisho ya Allah na kuachana na makatazo yake. 

Bila shaka maandalizi haya iwapo kama tutayatekeleza  kiukamilifu,  basi ya yanatosha kuwa sababu kuufunga mwezi wa Ramadhani kiukamilifu,   kiurahisi na kuhisi thamani ya Ramadhani na kutamani laiti mwaka wote ungekuwa ni Ramadhani.

Ewe Allah tufikishe Ramadhani na ukubali ibada zetu, hakika Wewe ni Msikivu, Mjuzi wa yote na juu ya kila jambo ni Muweza.

KUIPOKEA RAMADHANI KWA KUVUNJA JUNGU NI MAASI

 

BISMILLAHIR-RAHMAANIR-RAHIIM

Assalaamu Alaykum Warahmatullah!
Ni baada ya siku chache tu kwa msaada wake Allah Karim utakuwa unapumua na kuishi ndani ya mwezi mtukufu wa Ramadhani. Mwezi ambao huwapa waislamu fursa ya kuitekeleza mojawapo ya nguzo tano za Uislamu, swaumu ya Ramadhani. Katika kuuheshimu, kuutukuza na kuuenzi mwezi huu mtukufu.

Naam, Ramadhani hiyo mlangoni mwako inabisha hodi. Wewe kama muislamu umejiandaje kuupokea mwezi wako huu mtukufu? Je, wewe ni mmoja wa wale wanaoupokea mwezi wa Ramadhani kwa kile kinachojulikana kama VUNJA JUNGU?

Hebu na tujiulize kwa pamoja, tulivunjao hilo jungu mwaka hata mwaka na wale tusiolivunja, vunja jungu ni nini khasa? Bila ya shaka mtakubaliana nasi kwamba vunja jungu kama litafsirikanavyo kutokana na matendo yatendwayo na wavunja jungu katika kulivunja kwao hilo jungu. Ni mkono wa kwaheri unaopungwa kwa maasi mbalimbali kwa ajili ya kuingia kwa mwezi mtukufu wa Ramadhani. Wavunja jungu huitumia fursa ya zile siku mbili tatu kabla ya kuandama kwa mwezi mwandamo unaoashiria kuanza kwa funga tukufu ya Ramadhani.

Kuogelea na kupiga mbizi maradufu katika maasi waliyokuwa wakiishi nayo katika kipindi cha ile miezi kumi na moja nje ya Ramadhani. Kwa hivyo basi, vunja jungu kwa mlevi ni kulewa sana kwani hataipata fursa hiyo tena ila baada ya kumalizika kwa mwezi wa Ramadhani.

Vunja jungu kwa mzinifu ni kuzini sana na kutengana na kimada wake kuipisha Ramadhani, kisha mchezo uendelee baada ya Ramadhani. Vunja jungu kwa mpenzi wa muziki ni kukesha katika kumbi za starehe akicheza na kunywa kufidia ile fursa atakayoikosa kwa sababu ya kuingia kwa mwezi mtukufu. Mbele za watu hawa Ramadhani ni mithili ya gereza/kifungo kinachowaondolea na kuwanyang`anya uhuru wa kuishi kama wapendavyo kwa kufuata matashi na matamanio ya nafsi zao.

Hawa wanasahau kwamba wanawajibika kuishi kwa mujibu wa muongozo wa Mola Muumba wao na sio kwa kuongozwa na matashi yao! Kwa ujumla vunja jungu ni kushindana katika aina mbalimbali za maasi kwa sababu ya kuingia kwa mwezi mtukufu wa Ramadhani ambao hautoi uwanja wa maasi hayo kwa mijibu wa fikra zao potofu. Kwa nini tunasema kwa mujibu wa fikra zao potofu, hilo linatokana na ukweli kwamba hakuna kibali wala uhalali wa kufanya maasi na mtu kuishi kama apendavyo nje ya Ramadhani.

Ikiwa vunja jungu linaashiria jambo, basi jambo hilo halitakuwa jingine zaidi ya kuonyesha kufilisika kiimani kwa huyo mvunja jungu. Kwani muumini wa kweli hawezi kuvunja jungu, kwa kuwa anatambua kwamba kufanya hivyo ni kumuasi Allah Mola Muumba wake. Kwa muumini wa kweli kujiepusha na maasi na kumtii Mola wake ni zoezi linaloyatawala maisha yake yote. Bila ya kuangalia kuwa huu ni mwezi wa Ramadhani au ni nje ya Ramadhani. Kuagana na maasi eti kwa sababu tu ya kuingia kwa mwezi mtukufu wa Ramadhani, kisha kuyarejea tena baada ya kumalizika kwake.

Huo tukubali au tukatae ni UDHAIFU WA IMANI na si vinginevyo. Kwani huyo Mola wa Ramadhani unayeacha maasi ndani yake kwa ajili yake, ndiye Mola wa hiyo miezi mingine unayojihalalishia maasi ndani yake. Amri ya kumtii Mola wako kwa kuyatekeleza yote aliyokuamrisha na kuyaacha yote aliyokukataza inauhusu mwezi wa Ramadhani na baki ya miezi mingine isiyo Ramadhani.

Kumuabudu Mola wako ndani ya Ramadhani tu ni kujiuundia utaratibu wa ibada kinyume na ule aliokupangia Allah Mola Muumba wako. Elewa kufanya kwako hivi ni sawa na kusema kuwa utaratibu wa ibada aliokuwekea Mola wako aliye mjuzi wa manufaa na maslahi yako ama haufai au umepitwa na wakati. Na kwamba wewe kama kiumbe unaweza kujiundia utaratibu utakaokudhaminia manufaa na mafanikio katika ulimwengu wako huu na ule ujao. Elewa kwa mtindo na mtaji wako huo siku ya kiyama Allah atakuambia ujilipe wewe mwenyewe kwa kuwa yeye hakukuamrisha kufanya ibada kwa utaratibu huu unaokwenda nao sasa.

Ewe ndugu mpenzi wee! Elewa na ufahamu fika kwamba Ramadhani ipokelewayo na kukaribishwa na vunja jungu haitakuwa na athari yo yote kwako wewe ambaye ndiwe mlengwa wa Ramadhani na wala sio Mola wako. Kwako Ramadhani haitakuwa ila mithili ya kujenga nyumba angani bila ya kuwa na msingi imara uliokita ardhini.

Ewe ndugu mpenzi mvunja jungu, utaendelea kulivunja hilo jungu na kumuasi Mola wako mpaka lini?! Hebu jiulize, nini utakuwa mwisho wa huku kuvunja jungu kwako?! Tangu umeanza kuvunja jungu na bila shaka ni jungu la maasi umepata na kuvuna nini?! Ndugu mpenzi hebu ihurumie nafsi yako kwa kuitegea sikio la usikivu kauli hii tukufu ya Mola wako: "ANAYEFANYA MEMA ANAJIFANYIA (mwenyewe) NAFSI YAKE, NA MWENYE KUTENDA UBAYA NI JUU (ya nafsi) YAKE (vile vile)…" [41:46]

Aya inakuongoza kutambua kwamba unapovunja jungu, hufanyi hivyo ila ni kwa hilaki na maangamivu ya nafsi yako wewe mwenyewe leo hapa duniani na kesho kule akhera. Ambapo utapewa daftari la amali zako uikute na vunja jungu yako, hapo ndipo utasema: "…OLE WETU! NAMNA GANI MADAFTARI HAYA! HAYALIACHI DOGO WALA KUBWA ILA YAMELIDHIBITI (yameliandika)! NA WATAKUTA YOTE YALE WALIYOYAFANYA YAMEHUDHURIA HAPO; NA MOLA WAKO HAMDHULUMU YO YOTE". [18:49]

Bwana Mtume-Rehema na Amani zimshukie-anasema: "Jibril alinijia na akaniambia: Ewe Muhammad! Ishi utakavyoishi, hakika wewe ni mwenye kufa. Na penda ukipendacho hakika utatengana nacho, na tenda ulitakalo hakika utalipwa kwalo…" Al-Baihaqiy Elewa ewe ndugu mpenzi ukiwa mwana kuelewa, elewa kwamba kwa mujibu wa hadithi hii:-
Vunja jungu yako ina mwisho wake ambao ni kufa kunakoashiria mwanzo wa safari ngumu ya kuhudhurishwa mbele ya Mola wako. Hii ndiyo siku anayoitaja Mola wako kwa kauli yake tukufu: "NA IOGOPENI SIKU AMBAYO MTARUDISHWA KWA ALLAH, KISHA VIUMBE WOTE WATALIPWA KWA UKAMILIFU YOTE WALIYOYACHUMA; NAO HAWATADHULUMIWA". [2:281]

Lewa sana kwani pesa ni zako,zini sana na endelea kuvunja jungu, lakini tambua kuwa iko siku moja utalipwa kwa yote uliyoyatenda hapa duniani: "BASI ANAYEFANYA WEMA (hata) WA KIASI CHA UZITO WA MDUDU CHUNGU ATAONA JAZAA YAKE. NA ANAYEFANYA UOVU (hata) WA KIASI CHA UZITO WA MDUDU CHUNGU ATAONA JAZAA YAKE". [99:7-8]

Ewe mvunja jungu wee! Hebu waidhika na sehemu hii ya kauli ya swahaba wa Mtume;Sayyidna Abdullah Ibn Abbas-Allah amuwiye radhi: "Ewe mtenda dhambi wee! Usijiaminishe na matokeo ya dhambi yako na tambua kwamba kiifuatiacho dhambi hiyo ni kikubwa kuliko dhambi yenyewe.

Kwani kule kutokuwaonea kwako haya malaika walioko kuliani na kushotoni kwako wakati unapofanya dhambi, hakupungui kuwa ni dhambi. Na kicheko chako wakati unatenda dhambi na ilhali hujui Allah atakufanya nini, ni kikubwa zaidi kuliko hiyo dhambi uitendayo.

Na kuichelea kwako dhambi unapofanikiwa kuitenda, ni kukubwa zaidi kuliko hiyo dhambi yenyewe. Na kuihuzunikia kwako dhambi kwa kushindwa kuitenda, ni kukubwa zaidi kuliko dhambi husika. Haya mpenzi mvunja jungu, ikiwa mpaka hapa bado hujawaaidhika na ukaacha kulivunja hilo jungu, hebu zidi kutega sikio:

Mtu mmoja alimwambia Sufyaan Thauriy-Allah amuwiye radhi-nipe nasaha ambazo nikizifanyia kazi sitathubutu kumuasi Allah. Sufyaan akamwambia: Yakumbuke mambo matano:
Je, inastahiki kwako kumuasi Allah na ilhali yeye ndiye anayekuruzuku?
Je, unadhani kuwa wewe unamuasi Allah na ilhali yeye anakuona?
Je, unaweza kumuasi Allah nje ya ufalme/milki yake?
Je, unaweza kuyaakhirisha mauti yakikujia?
Je, siku ya kiyama utakuwa una uwezo wa kujiondoshea adhabu?
Yule mtu akajibu: Siwezi lo lote katika hayo. Sufyaan akamwambia: Basi vipi unathubutu kumuasi yule anayekuruzuku, anakuona, nawe uko katika milki yake, akakuandikia mauti na wala huwezi kuizuia adhabu yake isikufike? Akasema mtu yule: Wallah sitamuasi muda wa uhai wangu.

Hebu nawe mvunja jungu, jiulize maswali matano hayo halafu ndio uamue ama kulivunja jungu au kutokulivunja. Kumbuka ewe ndugu muislamu kwamba:-
Kuvunja jungu ni kumuasi Allah na Mtume wake: "NA ANAYEMUASI ALLAH NA MTUME WAKE, NA KUIRUKA MIPAKA YAKE (Allah) ATAMUINGIZA MOTONI. HUMO ATAKAA MILELE NA ATAPATA ADHABU ZIFEDHEHESHAZO". [4:14]

Kuvunja jungu ni kuudhihaki mwezi mtukufu wa Ramadhani. Na kuudhihaki mwezi huu hakumaanishi kingine zaidi ya kuidhihaki Qur-ani Tukufu. Nako huku kuidhihaki Qur-ani, hakika si vinginevyo ila ni kumdhihaki aliyeshushiwa Qur-ani Mtume. Na hakuna anayethubutu kupinga kwamba kumdhihaki Bwana Mtume ni kumdhihaki Allah akiyemtuma. Na huko kumdhihaki Allah ni ukafiri tu na si vinginevyo: "AMA WALE WALIOKUFURU, NITAWAADHIBU ADHABU KALI KATIKA DUNIA NA AKHERA, WALA HAWATAPATA WASAIDIZI WA KUWASAIDIA". [3:56] Vunja jungu ni khadaa na ghururi za dunia. Uovu basi si huko kukhadaika, bali ni kushikilia kukhadaika baada ya kutanabahishwa. Wasalaamu Alaykum Warahmatullah.
_________________
Jazaakumullah

MWISHO